په ماشومتوب کې به مو پیچکاري کړې وي؟ کوم ماشوم چې له پېچکارۍ وېرېږي، ځینې ډاکټران ورته چاکلېټ یا شیریني ورکوي؛ خو په انډونیزیا کې د کرونا واکسین کولو لپاره د خلکو هڅولو یوه نوې لاره پيل شوې ده.
د دې هیواد په یوه کلي کې چې له ۴۵ کلنۍ پورته کس د کرونا واکسین کولو ته راځي، د تشویق په موخه ورته د حکومتي چارواکو له لوري یوه چرګه/چرګ د ډالۍ په توګه ورکول کېږي.
د دې کلي ملک رسنیو سره په خبرو کې ویلي، دا کار یې په دې خاطر کړی چې مشران واکسین کولو ته وهڅوي او د هغوی په زړه کې چې کومه وېره ده، هغه ترې ختمه کړي.
دا لومړی ځل نه دی چې په یوه هیواد کې واکسینو ته د خلکو د هڅولو لپاره داسې کار کېږي، تر دې مخکې په رومانیا او ځینو نورو هیوادونو کې هم د کرونا د واکسینو په مقابل کې خوراکي توکي وېشل شوي دي.